Zoram Today 29th May, 2024 (Wed): Cyclone Remal avanga Mizoram hmun hrang hranga chhiatna nasa tak thleng mek chu Hnahthial District pawh thli leh ruah sur nasa chuan harsatna a thlen nual a, chhiatna a thlen thu hriat anih rual hian District Bawrhsap Pu Chuauhnuna chuan a hmunah officer-te tir chhuak nghalin chhawmdawl ngai leh tanpui ngaite an tlawh nghal a, a mamawhte tan silpauline an pe chhuak zel bawk a ni.

Nimin May ni 28, 2024 atanga thli leh ruah nasa tak thawk chuan Hnahthial District ah chhiatna liantham thlen lo mahse lei tlahniam, chenna-in chhia leh leimin vanga inkalpawhna kawngpui tlanglo a awm nual a. Heng-ah te hian District Bawrhsap pisa a thawkte leh VC te bakah khaw hrang hranga tlawmngai pawlte tangkawp chuan chhawmdawl hna hi an kalpui reng a ni.

Tun dinhmuna Hnahthial District khaw hrang hrang chhiatna thleng hriat theih chinte chu:

1) Lungmawi leh Bualpui V inkar leimin leh thing tlu avangin eng lirthei mah tlang theih lohin a kawng a hnawh a, VDMC-te hmalakna in thenfai tura hmalak mek a ni.

2) Lungmawi-ah thli leh ruah sur nasat avanga chenna in pahnih bang leh inchung chhe nual te chu State Disaster Relief Fund atanga tanpuina tur ruahman sak mek an ni.

3) Chhipphir ah chenna in pakhat bang leh inchung chhia a awm bawk a, SDRF atanga tanpuina ruahman sak mek an ni bawk.

4) Electric veng, Hnahthial-ah electric ban tlu a awm a, P & E department chuan a thenfai hna an zo tawh a ni.

5) Chanmari veng, Hnahthiala HDFA turf ground bula leimin chu VDMC ten lei tla thenfai hna an thawk tawh bawk.

6) Tuipui D leh Darzo inkar leh Tuipui D leh Kutkawk (Hnahthial) inkar leimin chuan eng lirthei mah tlan theih lovin kawng a dang mek a, District Bawrhsap leh VDMC te hmalaknain

thenfai mek a ni.

7) New Ngharchhip leh Cherhlun inkar lei tlahniam chuan eng lirthei mah kal tlan theih lovin kawng a dang a, thenfai hna hi zawh tawh a ni.

8) Muallianpui leh South Vanlaiphai inkara leimin chuan inkalpawhna kawng a dang a, VDMC ten an thenfai tawh bawk.

9) Khawhri leh Tarpho inkar leimin in kawng a dang a,VDMC te hmalakna in thenfai tawh a ni.

10) Bualpui H Rest House panna kawng leiminin a hnawh pin chu thenfai mek a ni.

11) Heng bakah hian khaw hrang hrangah leimin mai hlauhawm ven nan silpauline thahnem tak ruahman niin heng lei nghetlo te hi silpauline a khuh zel an ni.

Tun dinhmunah Hnahthial atanga Serchhip leh Hnahthial atanga Lunglei inkalpawhna National Highway -54 ah leimin avanga harsatna awm hriat a nilova, lirthei a tlang bawk.

District Bawrhsap Pu Chuauhnuna chuan mipuiten khualrel chhiatna an tawhin an in leh lo mai a chhe lo a, an rilru leh ngaihtuahna thleng a nghawng tel thin thu a sawi a, hemi avang hian Hnahthial District chhunga khaw hrang hrang VC te chu chhiat tawkte hnenah a hma thei ang bera chhawmdawlna pek an nih theih nan District thuneitute a rang thei ang bera hriattir a pawimawh thu sawiin khuarel chhiatna laka kan him tlan nan fimkhur theuh turin Hnahthial District mipuite a chah bawk a ni. ‎

Source: DIPR